Ginpasidunggan kag ginpasalamatan ni President Ferdinand ‘Bongbong’ Marcos, Jr. ang Filipino athletes nga nagbulsa sang mga medalya para sa Pilipinas sa bag-o lang nagtakop nga 19th Asian Games sa Hangzhou, China.
Ginpatigayon ang “Gabi ng Parangal at Pasasalamat para sa mga Bayaning Atletang Pilipino” sa Rizal Memorial Coliseum kun sa diin ginpasalamatan man ang pagpaninguha sang coaches kag staff.
“On behalf of a proud and a grateful nation, I salute and I recognize the excellent performance that you displayed in the 19th Asian Games…But more than just a personal feat, your victory has boosted our people’s morale,” kabahin sang speech sang presidente.
Nagpasalig man ang presidente nga labi nga hatagan sang igtalupangod ang mga atleta nga masamaran ukon makaangkon sang injury sa training kag sa kumpetisyon.
“So I direct the Philippine Sports Commission, work with PAGCOR and other agencies to strengthen our medical scientific athlete services unit. We need to help our injured athletes so that they recover quickly and they can get back in the game,” dugang sini sa iya speech.
Sa seremonya, ang kada medalist ang nahatagan sang Presidential Citation bilang pagkilala sa ila nga achievement.
Ginhatag man ang insentibo paagi sa Philippine Sports Commission kag Philippine Amusement and Gaming Corporation nga nagdangat sa kabug-usan nga P19.1 million, samtang ang insentibo naman halin sa Office of the President ang naglab-ot sa P22.8 million.
May 18 ka medalya ang Pilipinas sa Asiad lakip na ang apat ka gold medals nga nakuha nanday EJ Obiena sa pole vault, Meggie Ochoa kag Annie Ramirez sa jiu-jitsu, kag Gilas Pilipinas sa men’s basketball.#
