Magahatag ang Israel sang lifetime social security benefits kag regular stipends kay Gelienor “Jimmy” Pacheco, ang Pinoy caregiver nga nalakip sa 24 ka mga bihag nga ginhilway sang Hamas militants sang nagligad lamang nga adlaw.
Gin-anunsyo ini sang Philippine Embassy in Israel kadungan sang ila pagpakita sang mga laragway ni Pacheco sang ginbisitan ini ni Israeli Foreign Minister Eli Cohen.
Dala man sa amo nga benepisyo nga ihatag sang Israeli government amo ang immediate family sang natungdan.
Photo: Philippine Embassy in Israel
Lakip man sa nagbisita kay Pacheco sa ospital amo si Ambassador Pedro “Junie” Laylo Jr.
Nahibaluan nga 49 ka adlaw man nga ginbihag sang Hamas si Pacheco lakip ang iban pa nga Israelis kag foreign nationals.
Isa siya ka caregiver sa Nir Oz, gindeklarar nga missing halin sang Oktubre 7, kag nakit-an pa sa aktuwal nga video nga gindala siya sang militante nga grupo.
Sang napatigayon ang apat ka adlaw nga ceasefire, nalakip siya sa una nga grupo sang mga bihag nga ginbuy-an sang Hamas kabaylo sang Palestinian detainees.
May isa pa ka Pinay nga nagapabilin nga missing sa Israel-Hamas war kag ginapatihan nga ginbihag man sang Palestinian militant group sa Gaza. #
