Ginkumpirma sang Department of Migrant Workers (DMW) nga missing gihapon ang isa ka Filipino crew member sang MV Tutor nga gin-atake sang Houthi rebels sang Yemen samtang nagalayag ini sa southern Red Sea kag Gulf of Aden.
Suno kay Migrant Workers Secretary Hans Leo Cacdac, ini nga Greek-owned bulk carrier ang may sakay nga 22 crew members kun sa diin mga Pinoy ang kadam-an. Sa pagpang-atake sang rebelde, nahalitan gid ang engine room kag pila ka parte sang vessel.
“Right now, we are still in the process of trying to ascertain. We’re trying to account for the particular seafarer in the ship and are praying that we could find him. Rest assured that all of the next of kin of the seafarers have been contacted,” suno kay Cacdac.
Ginpahayag man sang tiglikom nga safe man ang iban nga seafarers kag nakontak na sila sang gobyerno paagi sa video call.
Nakapakig-angot naman ang DMW sa Department of Foreign Affairs, manning agency, kag tag-iya sang barko.
Una na nga ginkondena sang DFA ang panibag-o nga atake sang Houthi rebels sa MV Tutor apang wala sini ginsapubliko kun pila ka Pilipino ang nadalahig sa amo nga insidente.
Nahibaluan nga ang Gulf of Aden, lakip ang Red Sea, ang ginakabig nga kabahin sang expanded high-risk area, agud mahatagan sang mas maayo nga proteksyon ang seafarers pati na ang Filipinos kasunod na sang nauna nga mga pagpang-atake sang Houthi rebels.
Halin sang Nobyembre 2023 pa sang nagsugod ang Houthis sa pag-atake sa international shipping sa amo nga ruta bilang pag-unong sa Palestine nga subong halos mapudpod na bangud sa gyera sang Israel kag Hamas. Bangud sa sini nga kahimuan sang rebelde, matandaan nga may tatlo na ka Pilipino nga napatay sang ginpalupadan man sang missile ang lain nga barko sa amo man nga ruta.
