ILOILO CITY – All out ang preparasyon nga ginahimo sang Filipino-Belgian mixed martial artist para sa finals sang Belgium’s Got Talent karon sa kaagahon, oras sa Pilipinas.
Sa interview sang Bombo Radyo, ginpahayag ni Ian Lodens nga wala untat ang ila rehearsals para sa dance routine nila sang partner nga si Natascha Van Es.
Suno kay Lodens, tubtob subong indi pa siya makapati nga makasulod sila sa finals sang nasambit nga reality talent search bangud isa pa lang ka tuig siya nga naga-training.
Sanday Lodens ang nakakuha sang pinakamataas nga boto sa semifinals rason nga nakasulod sila sa finals sang Belgium’s Got Talent kun sa diin ila maatubang ang 11 pa ka finalists.
Dako nga bulig suno kay Lodens ang kinaadman sini sa jiu jitsu bangud ang speed kag strength nga iya natun-an ang iya nagamit sa pagsaot.
Nahibaluan nga ang iloy ni Lodens ang isa ka Pinay nga tumandok sang Quezon City.