ILOILO CITY – Pangamuyo ang ginsaligan sang mga Pinoy sa siyudad sang Hualien, ang mismo sentro sang magnitude 6.4 nga linog sa Taiwan, kasunod sang tuman nga kahadlok nga nabatyagan.
Sa interview sang Bombo Radyo Iloilo, ginpahayag ni Cristina Buena-Agua sang Baguio City apang sa karon nagatrabaho bilang caregiver sa Hualien City, gin-antos niya ang tuman nga kakulba samtang ginatay-og ang ila balay bangud nga indi makahalin tungod sang paralisado nga tigulang nga iya ginabantayan.
Sa tatlo ka tuig niya sa Taiwan, naanad na si Buena-Agua sa linog, apang kagab-i lang niya nabatyagan ang mabaskog nga pagtay-og.
Suno kay Buena-Agua, tuman ka baskog sang pagtay-og, naga-awas ang tubig sa ila aquarium, nagkalahulog ang mga frames kag nagkalaguba ang mga TV sets.
Pangamuyo sini nga makapauli sang buhi sa iya pamilya bangud matapos na ang iya kontrata sa masunod nga bulan.
Suno kay Buena-Agua, indi maagyan ang mga dalanon sa Hualien matapos maguba ang mga dalan kag mga taytay.
Wala man sang eroplano nga nagahugpa kag maka-take off sa Hualien Airport matapos ini nga na-shutdown kasunod sang linog.