Ginhingadlan na sang state prosecutors ang Filipino seafarer nga napatay bangud sa pagbunggo sang cargo ship sa isa ka oil tanker samtang yara sa North Sea sa northeastern coast sang United Kingdom.
Ini amo si Mark Angelo Pernia, 39, nga subong wala pa gihapon nakit-an ang lawas apang ginapatihan sang otoridad nga napatay na kasunod sang insidente sang nagligad pa nga Marso 10.
Wala pa sang dugang nga impormasyon nga ginpaguwa kun taga-diin ang amo nga seafarer apang ginsiling sang Humberside Police nga nahimo na sang otoridad kag coastguard ang “extensive searches” apang wala gid ini makit-an.
Ginpahayag nga ulihi nga nasiplatan ang seaman sa parte sang barko nga amo ang nasunog matapos ang pagsigabong nga natabo.
Sa pihak nga bahin, nag-atubang na sa korte ang kapitan sang barko matapos ini ginkasuhan sang gross negligence manslaughter.
Isa ini ka Russian national, gin-identify nga si Vladimir Motin, 59, kag nagpabilin subong sa kustodiya sang otoridad. Wala ini sang gin-plead kag sunod nga makit-an sa hearing sa London sa Abril 14.
Siya ang kapitan sang Portuguese-flagged cargo ship nga Solong kun sa diin nakasakay ang Filipino seafarer sang nagbunggo ini sa naka-angkorahe nga US-flagged tanker nga Stena Immaculate nga may unod nga jet fuel rason sang gilayon nga pagkarab-karab sang duha ka vessels.
Ang Stena Immaculate ang parte sang 10 ka tankers nga iya sang Tanker Security Program sang Estados Unidos agud nga mag-suplay sang fuel sa ila nga militar.
Ang nagapanguna subong sa imbestigasyon amo ang UK, US, kag Portuguese teams agud nga matumod gid ang rason sang collision, kag kun ngaa wala naglikaw ang Solong kag nagbunggo gid sa tanker.
Una na ginsiling sang UK government nga wala ini sang nakit-an nga foul play.
