Gin-alegar sang pamilya nga wala sang ihibalo ang 28-anyos nga Pinoy seafarer nga si Rodrigo “Rod” Favis nga magalabay gali ang ila barko sa Strait of Hormuz.
Si Rod amo ang isa sa duha ka Filipino seafarers nga napatay samtang sakay sang Saudi Arabian oil tanker nga gin-igu sang wala pa makilala nga mga projectile samtang nagalabay sa amo nga critical waterway.
Suno sa iya utod nga si Ryan Favis, wala sa kontrata ni Rod ang pagbiyahe sa Strait of Hormuz kag ang orihinal nga ruta sang barko amo lamang ang Europe.
Pila lamang ka oras antes sang insidente suno kay Ryan, didto pa lang kag nahibaluan ni Rod nga pakadto sila sa Strait of Hormuz matapos ini masugiran sang iya mga kaupod sa barko.
Suno pa sa iya utod, nagsiling pa si Rod nga, “Kuya, papasok kami sa Strait of Hormuz.”
Ginpahayag sang utod nga nakahibalo siya nga ginakulbaan si Rod apang ginapakalma lang sini ang kaugalingon sang amo nga tion.
Nahibaluan man nga inadlaw na lang kuntani ang nabilin antes matapos sang amo nga seafarer ang iya nga employment contract.
Ginahulat na gid ni Rod ang pagpauli bangud nagabusong ang iya live-in partner sa ila una nga bata—isa ka balita nga iya nahibaluan tatlo ka adlaw antes sang iya kamatayon.
Ginahingyo naman sang pamilya ang isa ka maid-id nga imbestigasyon sa insidente kag posible man suno sa ila nga magpasaka sila sang kaso.
Nauna na nga nakapagwa sang statement ang shipping company nga Bahri nga nagakumpirma sang trahedya: “It is with profound sadness that Bahri confirms the loss of two of its Filipino seafarers as a result of the incident. The company extends its deepest condolences and heartfelt sympathies to their families, loved ones, and colleagues during this difficult time.”
Samtang, ginmanduan ni Presidente Ferdinand “Bongbong” Marcos Jr. ang mga ahensya sang gobyerno nga maghatag sang kinahanglanon nga bulig sa pamilya nanday Rod kag isa pa ka Filipino seafarer nga napatay sa pag-atake.
Makapila ka beses na nga ginapahanumdom sang Department of Migrant Workers ukon DMW sa mga shipowner nga kinahanglan sila magpatigayon sang risk assessment antes maglayag, magsiguro sang bastante nga security protocols kag reporting mechanisms, kag respetuhon ang kinamatarong sang mga Filipino seafarers nga magbalibad sa paglayag kun ang barko pakadto sa mga lugar nga mataas ang risgo.
Sang Mayo, matandaan nga ginpahayag sang DMW sa Senate Committee on Migrant Workers nga halos 1,000 ka Filipino seafarers na ang naggamit sang ila kinamatarong nga magbalibad sa paglayag kag ginrespeto ang ila desisyon.
Ginpatawag ang amo nga hearing sang Mayo matapos ang drone attack malapit sa Strait of Hormuz nga nakapilas sa pito ka Filipino seafarers nga sakay sang M/V San Antonio.#
