Mas nagdamo ang Filipino seafarers nga nagapangindi na sa pagsakay sa mga barko nga magalayag sa Red Sea kag sa Gulf of Aden — ang mga lugar kun sa diin masami nga naga-atake ang rebelde nga Houthis.
Suno sa Department of Migrant Workers (DMW), 78 na ka mga Pinoy ang nag-manifest nga indi sila maglabay sa nasambit nga war-like areas nga mas mataas sa una na-report nga 25.
Natalana nga mag-atubang ang ahensya sa dugang nga grupo sang seafarers kag iban pa nga stakeholders para sa isa pa ka hugnat sang konsultasyon. Tuyo sang diskusyon nga amyendahan ang existing rules kag agud mahatagan sang mas maayo nga proteksyon ang Filipino seafarers.
Sang Hunyo 12, matandaan nga nag-atake ang Yemeni Houthi movement sa barko nga MV Tutor sa southern Red Sea gamit ang unmanned surface vehicle kag anti-ship missile.
21 ka Filipino crew members ang nakaluwas kag nakapauli sa Pilipinas, apang isa sa ila upod ang ginapatihan nga na-trap sa engine room sang barko nga naglugdang inadlaw matapos ang atake.
Sang Marso, duha man ka Filipino crew members ang napatay kag duha man ang nasamaran bangud na-igu man ang barko nga MV True Confidence sang anti-ship ballistic missile nga ginpalupad man sang Houthi rebels sa Red Sea.
Ini magluwas pa sa nauna nga pagpang-atake lakip na ang sang Nobyembre 2023 kun sa diin 17 ka Pinoy crew sakay sa barko nga Galaxy Leader ang ginbihag sang Houthis sa Yemen kag tubtub subong wala pa nakapauli.
