Nagpaguwa sang statement ang Britanya nga ginapatihan nga patay na ang Pilipino nga seaman nga na-missing nagbungguanay ang ila ginsakyan nga container ship kag ang isa oil tanker sa northeast coast sang England subong lang nga semana.
Suno kay British maritime minister Mike Kane, gintapos na ang search and rescue operation.
Base sa reports sa Licensed Manning Agency (LMA), sakay ang seafarer sa Portuguese-flagged container ship sang nagbunggo ini sa U.S.-flagged chemical tanker nga Stena Immaculate sa North Sea sang Marso 10.
Suno naman sa Department of Migrant Workers (DMW), siyam tanan ang mga Pilipino nga crewmembers sa amo nga container ship apang walo lang ang hilway na subong sa katalagman.
Ulihi nga nakit-an ang seaman sa bow sang vessel nga amo ang area sang barko nga nasunog matapos ang pagsigabong nga natabo.
Ang walo naman ka iban nga seafarers ang gindala sa hotel sa Grimsby, London kag nagahulat na lang sang repatriation.
“The seaman was last seen at the bow of the vessel, the area of the ship that caught on fire after the massive explosion,” suno sa DMW.
“There are eight other Filipino seafarers on board MV Solong and all of them were safely rescued and presently accommodated in a hotel in Grimsby, London, as they await their repatriation,” pahayag pa sang ahensya.
Nagapanguna naman ang mga otoridad sa United Kingdom sa imbestigasyon kun ano gid ang rason sang pagbungguanay. Nagapakig-angot man sila sa flag states sang vessels.
Una na nga ginpahayag nga halin ang container ship sa Grangemouth, Scotland kag pakadto kuntani sa Rotterdam sa The Netherlands.
Ang Stena Immaculate naman ang parte sang 10 ka tankers nga iya sang Tanker Security Program sang Estados Unidos agud nga mag-suplay sang fuel sa ila nga militar.
Nahibaluan nga arestado na ang 59-anyos nga kapitan sang barko nga Solong kag gin-identify nga isa ka Russian national. Gindakop siya sa akusasyon sang gross negligence manslaughter.
