ILOILO – Gin-relieve bilang pinuno sang Provincial Intelligence Unit sang Iloilo Police Provincial Office si Police Major Jonathan Pinuela.
Sa interview sang Bombo Radyo kay Police Master Sergeant Francisco Lindero, tagpamaba sang Iloilo Police Provincial Office, ang relief order ang napetsahan sang Pebrero 14 kag ginpirmahan ni Officer-in-Charge Police Col. Paul Kenneth Lucas.
Suno kay Lindero, may yara sang staffing pattern ang Iloilo Police Provincial Office agud nga hatagan sang ligwa ang promotion sang mga pulis kag sa pagkamatuod, pamunu-an ni Pinuela ang Police Management and Strategy Unit nga isa ka bag-o nga division.
Ginpahayag ni Lindero nga mangin katungdanan sang nasambit nga division amo ang monitoring, programming kag governance sang Iloilo Police Provincial Office.
Si Pinuela ang pagabuslan ni Police Major Gervenson Moyo nga amo man ang nagaserbe bilang nga hepe sang Oton Municipal Police Station.
Gin-athag man sang natungdan nga wala sang kahilabtanan sa pag-relieve kay Pinuela ang ginapahayag kontrobersiyal nga raid sa Dumangas, Iloilo sa diin 154 ang nadakpan nga nagapatigayon sang pauwak kag ang kontrobersiyal nga drug operation sa Pavia, Iloilo.
Sa pihak sang kontrobersiya, madamo man ang nangin accomplishment ni Pinuela sa kampanya batok sa illegal drugs kag illegal gambling.
