Ginkumpirma sang Commission on Elections (Comelec) Legal Department nga pareho lang ang pirma ni Bamban, Tarlac Mayor Alice Guo kag sang Chinese national nga si Guo Hua Ping.
Ini nga report sang department ang natalana nga igapasa sa Comelec en banc.
Sa idalom sang pagsulundan sa pungsod, indi mahimo makapadalagan ang Chinese national sa eleksyon sa Pilipinas.
“Dahil Chinese si Guo Hua Ping may presumption, may misrepresentation ‘yung Alice Guo na siya ay Pilipino. Ang sabi ng aming Law Department at panel, nangangahulugan na hindi siya Pilipino, and therefore, dapat siyang kasuhan ng kasong kriminal,” suno kay Comelec chair George Garcia.
DIRI PA SA PILIPINAS SI ALICE GUO
Ginpahayag naman sang Department of Justice nga wala pa nakaguwa sa Pilipinas si Guo sa pihak sang sampaw-sampaw nga mga akusasyon nga naangot sa iya partikular ang iligal nga Philippine offshore gaming operator (POGO).
“May mga information naman kami mula sa ibang mga ahensya, mga kawani na nandito pa siya sa Pilipinas,” suno kay anti-trafficking chief kag DOJ Undersecretary Nicholas Felix Ty.
Matandaan nga gindagdagan si Guo sang arrest order halin sa Senado bangud wala ini nagatambong sa hearings nga ginapangunahan ni Senator Risa Hontiveros bangud ginarason sini ang anxiety kag trauma.
Magluwas diri, nagapangatubang man ang kontrobersyal nga alkalde sang trafficking complaint, isa ka non-bailable offense, bangud sa ginaalegar nga kahilabtanan sini sa iligal nga POGO nga gin-raid sang otoridad sa Bamban.
Naka-schedule sa Agusto 6 ang masunod nga preliminary hearing sa trafficking complaint nga gin-file batok kay Guo. Mahimo makapaathag ang opisyal paagi sa pag-file sang counter-affidavit kag pananglitan indi siya makapasa, mahimo nga makadesisyon na ang prosecutor sa reklamo kag ipasaka sa korte ang kaso.
Nahibaluan nga wala nagatambong si Guo sa nauna nga preliminary investigations apang gin-representar siya sang iya mga abogado.
Sa upper chamber sang Kongreso, nauna na nga may nagguwa nga statements halin sa pila ka senador nga possible nakaguwa na si Guo sa pungsod gamit ang iya Chinese passport.
