ILOILO – Ginahingyo sang Pinagkaisang Samahan ng mga Tsuper at Operator Nationwide (Piston) – Panay nga ipauntat ang pagpatuman sang memorandum nga nagadumili sa mga tricycle kag trisikad nga magbyahe sa mga national road.
Sa interview sang Bombo Radyo kay Edgar Salarda, presidente sang Pinagkaisang Samahan ng mga Tsuper at Operator Nationwide (Piston) – Panay, iya ginpahayag nga kasubong nga wala gintun-an ang pagdihon sang nasambit nga memorandum.
Suno kay Salarda, ang nasambit nga memorandum ang pabor para sa mga operator sang dalagku nga mga salakyan apang apektado naman ang mga operator kag driver sang tricycle kag trisikad.
Ginpahayag ni Salarda nga magluwas sa mga operator kag driver, labing apektado ang mga commuter ilabi na nga may mga dalan nga ang tricycle kag trisikad gid lamang ang naga-agi.
Gin-athag sang natungdan nga wala nila ginabalabagan ang mga programa nga para sa kauswagan sang pungsod apang indi nila mabatas nga madulaan naman sang palangabuhi-an ang mga driver sang tricycle kag trisikad.
