ILOILO CITY – Mahimo pa nga madugangan ang numero sang mga driver nga maga-untat sa pagbyahe bangud sa ginapatuman nga 1-meter physical distance sa mga de-pampasahero nga salakyan.
Sa interview sang Bombo Radyo kay Edgar Salarda, Presidente sang Pinagkaisang Samahan ng mga Tsuper at Operator Nationwide (PISTON) – Panay, iya ginpahayag nga santo sa iya pagpanilag sa palibot sang syudad sang Iloilo, naggamay ang numero sang mga driver nga nagabyahe magluwas sa mga driver nga una na nga nag-anunsyo sang transport strike.
Suno kay Salarda, magapamiyerdihan sang daku ang mga driver kag operator kun tuman ka gamay ang numero sang mga pasahero nga makasakay sa tagsa ka trip.
Apisar nga pataasan sa P15 ang minimum fare, ginpahayag ni Salarda nga indi ini praktikal bangud nga lubos naman nga maapektuhan ang mga commuters.
Sa pagkamatuod suno sa natungdan, madamo na nga mga driver ang nagpalab-ot sang reklamo sa iya tuhoy sa nasambit nga pagsulundan kag nagpahayag nga mapilitan sila nga mag-untat anay sa pagbyahe.
