ILOILO CITY- Nagpaathag ang Pinagkaisang Samahan ng mga Tsuper at Operator Nationwide (PISTON) Panay kun nga-a gamay sa gihapon ang numero sang mga jeep nga nagabyahe sa syudad sang Iloilo.
Sa interview sang Bombo Radyo kay Edgar Salarda, Presidente sang PISTON Panay, iya ginpahayag nga nabudlyan ang mga driver kag operator bangud sa ginapatuman sang Land Transportation Franchising and Regulatory Board nga kinahanglan magpa-miyenbro anay sa transport cooperative antes makabyahe.
Suno kay Salarda, mahal ang ila baydan sa tion nga magsulod sa kooperatiba agud makakuha sang special permit.
Ginpahayag ni Salarda nga wala nalab-ot ang 50% bangud madamo pa sa gihapon ang wala nakapa-miyembro sa kooperatiba.
Sa bahin naman sang ayuda para sa mga driver nga ginpaagi sa Land Transportation Franchising and Regulatory Board suno sa natungdan, wala na sila nagalaum nga mahatag pa ini bangud tubtob subong, padayun lang sila nga ginapasalig nga ginaproseso na ang ayuda para sa ila.
