ILOILO CITY – Patay ang pito ka bulan nga bata nga lalaki matapos mabunggu-an sang motorsiklo ang ginasakyan sini nga tricycle sa Barangay Suclaran, San Lorenzo, Guimaras.
Magluwas sa bata, patay man ang driver sang motorsiklo nga ginkilala kay Michael Nono, 34, residente sang Barangay Constancia, San Lorenzo, Guimaras.
Sa interview sang Bombo Radyo kay Police Captain Andres Somez Jr., hepe sang San Lorenzo Municipal Police Station, iya ginpahayag nga samtang nagapauli si Nono angkas ang iya pito ka tuig nga bata nagikan sa isa ka birthday party, hinali nalang ini nga nadulaan sang preno rason nga nabunggu-an sini ang kasugata nga tricycle.
Bangud sini, naka-agum sang pilas sa nagkalain-lain nga bahin sang iya lawas ang driver sang motorsiklo nga gintuna-an sang iya kamatayon.
Samtang, ang sakay sa tricycle amo sanday Guemel Martir, 25, Lizyl Gabasa, 32, isa ka 5 ka tuig nga bata, Crizel Ann Gadian, 25, kag ang pito ka bulan nga bata nga lalaki nga napatay, lunsay mga residente sang Barangay Cabungahan, San Lorenzo Guimaras.
Naka-angkon naman sang pilas sa ulo ang pito ka bulan nga bata nga ginapatihan nga nagbunggo sa tricycle kag ginbawian sang kabuhi bangud sa tuman ka baskog sang impact.
Sa imbestigasyon sang kapulisan, nakainom kag wala sang suksok nga helmet ang driver sang motorsiklo sang natabo ang insidente.
