ILOILO CITY – Nagdangat na sa pito ka mga ospital sa Western Visayas ang nakapasa sang ila intent letter sa Department of Health 6 sa diin nakasaad nga luyag nila nga sila na mismo ang magpatigayon sang Polymerase Reaction Test (PCR test) para sa Coronavirus Disease 2019 (COVID-19).
Sa interview sang Bombo Radyo kay Dr. Renilyn Reyes, COVID-19 spokesperson sang Department of Health 6 iya ginpahayag nga sa nasambit nga numero duha diri ang sa Negros Occidental, Bacolod, Iloilo kag isa naman sa Aklan.
Suno kay Reyes, ang duha ka mga ospital sa Negros nga amo ang Corazon Locsin Montelibano Memorial Regional Hospital kag Teresita Jalandoni Provincial hospital ang yara na sa stage 3 kag pagkatapos sini mahimo na sila makasugod patigayon sang test.
Samtang sa Bacolod amo ang Bacolod Queen of Mercy Hospital kag Bacolod Doctor’s Hospital nga nagapreparar na sang sertipikasyon.
Sa bahin naman sang Iloilo amo ang West Visayas State University Medical Center kag Metro Iloilo Hospital and Medical Center kag Dr. Rafael S. Tumbokon Memorial Hospital sa probinsya sang Aklan nga nagahulat nalang nga makompleto ang pila ka mga requirements antes makapatigayon sang test.
