Ginkustodiya na ang pito ka mga pulis nga gin-tag bilang mga “persons of interest” sa pagluthang sa kontrobersyal nga mayoral candidate sa Albuera, Leyte kag self-confessed drug lord nga si Kerwin Espinosa.
Suno kay Philippine National Police (PNP) spokesperson Police Brigadier General Jean Fajardo, gina-imbestigaran subong kun may kahilabtanan sila ukon wala sang shooting incident.
Na-tag sila bilang persons of interest bangud nakit-an sila sa compound kun sa diin nagkadto ang suspected getaway vehicle samtang nagapatigayon ang mga awtoridad sang hot pursuit operation.
“Nagsagawa po tayo ng pursuit operation dahil may isa po tayong motor vehicle in interest, isa pong Montero, na diumano umalis po kaagad doon sa site noong mangyari po yung insidente,” suno kay Fajardo. “Nasundan po ito kaagad. Pagpasok po ng compound may naabutan po doon na mga pulis po.”
Ang pito ka mga pulis nga naka-assign sa Ormoc City Police Station ang nakasuksok sang pangsibilyan nga panapton suno kay Fajardo. Duha sa ila ang mga opisyal pa, kag lima naman ang non-commissioned officers.
Duha ka mga salakyan ang nakit-an sa compound kag may mga pusil man nga nakit-an sa sulod sang amo nga mga salakyan.
Matandaan nga pasado alas kuwatro sang hapon sang Huwebes sang natiruhan si Espinosa samtang nagahulat ini sang iya turno nga maghambal kadungan sang campaign event sa Albuera.
Bantog ang pangalan ni Espinosa bangud gin-ako sini sa Senado sang 2016 nga involved siya sa illegal drug trade.
Sang 2018, nagpahayag naman ini sa counter-affidavit sa state prosecutors nga ang iya mga statement sa Senate ang indi makapamatuod nga isa siya ka drug lord kun wala man sang drug evidence. Sang Hunyo 2024, ginbasura sang korte sa Baybay, Leyte ang drug case batok sa iya.
May kaso pa siya nga money laundering sa korte sa Pasay, kag may duha pa ka kaso sang illegal possession of dangerous drugs kag illegal possession of firearms nga ginpabuksan liwat sang Court of Appeals.
STATEMENT NI KERWIN ESPINOSA
Sa iya naman press conference matapos natiruhan sa Albuera, Leyte, ginpahayag ni Espinosa nga natingala siya kun ngaa ginauna pa sang mga awtoridad ang persons of interest sa baylo nga kadtuan siya sa ospital kag imbestigaran ang natabo.
Pahayag sini, gindala pa sa police regional office ang persons of interest sa baylo nga sa police station sa Albuera.
Apisar ginklaro sini nga wala siya nahadlok sa pagpangampanya kasunod sang shooting incident, naghingyo ini sa Commission on Elections nga hatagan siya sang security detail. Mas maayo man suno sa natungdan kun mapaidalom ang Albuera sa Comelec control subong nga eleksyon.
