ILOILO CITY – Pito ka tawo ang napatay sa natabo nga landslide sa Noney district sa Manipur, India.
Suno sa mga opisyal, 19 ka mga tawo ang natigayon nga ma-rescue matapos nga nag-usmod ang bahin sang bukid kag na-igo ang railway construction camp.
Nagpalab-ot naman sang pagpakig-unong si Prime Minister Narendra Modi sa pamilya sang mga napatay kag nagpangamuyo para sa seguridad sang mga naapektuhan.
Suno naman kay army spokesman Sumit Kumar Sharma, nabudlayan ang mga ini sa rescue operation bangud sang pag-ulan kag madamo pa nga landslide.
Naka-standby naman ang helicopter sang army kag nagahulat nga magnami ang tyempo.
Ang nasambit nga lugar sa India ang naga-eksperyensya sang mamunog nga ulan nga amo ang rason sang landslide kag pagbaha nga nagpatay sa dinosena nga mga tawo.
Kung madumduman subong lang nga tuig, 10 ang patay lakip na ang isa ka apat ka tuig nga bata sa mamunog nga pag-ulan.
