ILOILO CITY – May yara sang pagbag-o sa dalagan sang trapiko kadungan sa pagpatuman sang Traffic Discipline Zone sa Sen. Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Iloilo City Mayor Jerry Treñas, iya ginpahayag nga santo sa feedback sang Public Safety and Transportation Management Office, nangin light to moderate ang dalagan sang trapiko sa Diversion Road.
Suno kay Treñas, ginatinguhaan subong sang syudad nga matigayon ang pagpahamtang sang mga waiting shed ilabi na sa Loading kag Unloading areas.
Ginpahayag ni Treñas nga mas makapaayo kun ang mga pasahero nga nagabantay sang jeep ang nagalinya sa higad sang dalan agud nga indi magdinaguso.
Sa subong suno sa natungdan nga may yara na sang design ang pagatukuron nga waiting shed kun sa diin pagadugangan man ang mga traffic auxilliary apang kutob lang anay sa 10:00 sang gab-i ang deployment.
Samtang, pila ka mga violator ang nahatagan sang citation ticket subong nga gab-i bangud sa pagmaneho nga wala sang lisensya, wala sang suksok nga helmet kag may dysfunctional nga headlight.
Sa pagpangdakop sang composite team, may pila man ka motorista ang naglikaw agud nga indi madakpan nga nagalapas sa ordinansa.
Sa paglibot sang Bombo News Team, nakit-an ang mga traffic auxilliary, mga pulis kag mga katapo sang composite team nga nagabantay sa Diversion Road.
Sa interview sang Bombo Radyo kay Police Lt. Col. Efren Lozada, pinuno sang Traffic Investigation and Enforcement Unit sang Iloilo City Police Office, iya ginpahayag nga sa ika duha nga adlaw sang pagpatuman sang Traffic Discipline Zone, may yara sa gihapon sang violators nga nahatagan sang citation ticket.
Suno kay Lozada, lakip sa common violation amo ang indi paggamit sang helmet, indi paggamit sang seat belt, overloading kag illegal parking.
Ginpahayag ni Lozada nga ginatutukan subong sang composite team amo ang information dessimination tuhoy sa Loading kag Unloading areas apang lauman nga sa masunod nga semana, umpisahan na ang pagpatuman sini.
