Yara na subong sa kustodiya sang National Bureau of Investigation (NBI) ang pito ka tawo nga konektado sa flood control scandal kag nalakip sa gindagdagan sang arrest warrant sang Sandiganbayan.
Suno kay Pres. Bongbong Marcos, isa ang naaresto samtang anom sa ila ang nagdesisyon nga mag-surrender.
Magluwas diri suno sa presidente, duha pa ka mga indibidwal ang nagpakita man sang interes nga mag-surrender.
Sa subong, si resigned Ako Bicol Rep. Zaldy Co kag anom pa nga iban nga gin-isyuhan man sang arrest warrant ang padayon nga ginapangita sang mga otoridad.
“Sa mga natitira, sumuko na kayo. At sa mga tumutulong magtago sa mga personalidad na ito, tandaan ninyo, may pananagutan din kayo sa batas,” suno sa presidente.
Una nga nagpahayag si Interior and Local Government Secretary Jonvic Remulla nga tubtub subong nga adlaw na lang, Lunes, ang ginahatag kay Co kag iban pa nga magsungka.
“Otherwise, we will hunt them down. We will do everything we can for them to face the law,” base sa paandam sang tiglikom.
Sandig sa tracking sang DILG, nakit-an si Co sa Japan sang Lunes, apang sang ulihi nagkadto sa China kag posible nga nagpadulong sa Europa sang Huwebes.
