Nagdangat na sa pito ka mga miyembro sang Philippine National Police (PNP) ang nasamaran bangud sa padayon nga tensyon sa Kingdom of Jesus Christ compound (KOJC) sa Davao City samtang nga ginapangita ang pugante nga self-proclaimed Appointed Son of God nga si Pastor Apollo Quiboloy.
Eksakto nga ika-apat nga adlaw adlaw na subong, Agusto 27, halin sang ginlunsar sang otoridad ang operasyon batok sa pastor nga wanted sa kaso nga human trafficking kag sexual. Ginapangita man ang mga kaupdanan sini nga akusado.
Suno kay PNP spokesperson Col. Jean Fajardo, anum sa ila personnel ang ginpangdala gid sa Camp Quintin M. Merecido Hospital para sa medical treatment samtang isa naman ang ginbulong mismo sa compound.
Ginpatpat ni Fajardo nga nabuklan ang ulo sang isa ka pulis, may nahalitan nga nose bridge, kag kadam-an ang napilasan sa kamot kag tiil.
Ginsiling sini nga nangin agresibo ang mga myembro sang KOJC kun sa diin nagapanghaboy ang mga ini sang monobloc chairs, kag may videos man nga ginpaguwa ang Police Regional Office XI kun sa diin nakit-an nga may nagapanghaboy sang daku nga bato kag nagapangbasya sang mapangsot kag mabaho nga tubig.
“May putok na ulo na pulis natin, may basag ang nose bridge, maraming galos, maraming sugat sa paa at sa kamay. In fact, kung mapapansin ninyo hindi nanghuli ang ating kapulisan kahapon we want to deescalate yung (the) tense situation kahapon kahit pa binato tayo ng mga monobloc chairs at yung claim nila na meron tayong tear gas na ginamit ay wala katotohanan yun,” pahayag sini.
Sa press briefing, ginklaro sang natungdan nga indi mga pulis ang naga-umpisa sang ginamo baliskad sa alegasyon sang supporters ni Quiboloy nga naggamit ang otoridad sang tear gas.
Suno kay Fajardo, kun matuod nga naggamit ang pulis sang tear gas, kuntani nagsuksok man sila sang gas mask.
Peke ang report nga may tear gas suno sa natungdan bangud sa pagkamatuod, fire extinguisher ang gingamit sang mga myembro mismo sang KOJC sang Domingo sang gab-i kag gin-video ang ila kaugalingon nga apektado agud magguwa nga ang pulis ang balasulon.
Ginbulgar man sang natungdan nga may video sila kun sa diin nakit-an gid nga ang mga miyembro mismo sang KOJC nga nagasakit sa ila kaugalingon para mapaguwa nga ginkastigo sila ukon ginsamaran sang mga pulis.
“We are just waiting na ma-authenticate itong video na ito to show how desperate these people are para ipakita na umaabuso ‘yung mga pulis natin, nanakit ng mga pulis natin but on the contrary, ‘yung mga pulis natin ang minumura, tinatadyakan at sinasaktan at lahat ng klase ng pagmumura ay natanggap nung ating mga kapulisan,” pahayag ni Fajardo.
Sa tunga sini nga tensyon, ginpahayag sang Davao police nga padayunon nila ang pag-operate sa sulod sang 30-hectare compound bangud mas kumpyansa sila subong nga yara gid si Quiboloy sa sulod sini. ##
