ILOILO – Gina amat-amat na sang Land Transportation Office 6 sa pagpanghatag ang mga plaka nga nalakip sa backlog.
Ini ang may kaangtanan sa ginapatuman sang Philippine National Police nga “No Plate, No Travel” policy nga mismo ginmandu ni Presidente Rodrigo Duterte.
Sa interview sang Bombo Radyo kay Atty. Gaudioso Geduspan, Officer-in-Charge sang Land Transportation Office 6, iya ginpahayag nga ang mga 2016-2018 nga plate number para sa mga salakyan ang amat-amat na nga ginahatag samtang ang plaka nga nalakip sa una nga anum ka bulan sang 2019 ang natapos apang indi pa ini mahimo nga ipanghatag bangud sa kakulang sang Radio Frequency Identification sticker.
Suno kay Geduspan, ang nalakip sa nabilin nga anum ka bulan sang 2019 tubtub 2020 ang amat-amat na nga ginapanghatag samtang ang ginaduso nga duha ka plaka para sa mga motorsiklo ang pending pa sa gihapon sa Kongreso kag ginatinguhaan naman sang ahensya nga mapadasig ang pag-aproba sini.
Ginpahayag ni Geduspan nga para sa mga driver nga wala pa nakakuha sang plaka, kinahanglan nga magdala sang dukomento agud nga indi pagdakpon sa tion nga may yara sang checkpoint.
Samtang, suportado naman sang ahensya ang ginaduso nga 24/7 nga pagbantay sa Traffic Discipline Zone sa Sen. Benigno Aquino Jr. Avenue, Mandurriao, Iloilo City.
Suno kay Geduspan, ang Iloilo City Government ang lead agency sa pagpatuman sang Traffic Discipline Zone kag sila sa Land Transportation Office kaupod ang iban pa nga ahensya sang gobyerno ang nakahanda nga magbulig.
Ginpahayag sang natungdan nga sa subong, dapat tutukan ang information dissemination agud nga maanad ang mga motorista sa Traffic Discipline Zone.
