ILOILO CITY- Ginpatpat sang isa ka law expert ang posible remedyo nga mahimo ni US President Donald Trump may kaangtanan sa iya plano nga election protest batok kay Democratic Presidential candidate Joe Biden.
Ini kasunod sang akusasyon sang kampo ni Trump nga may nagakatabo nga election fraud sa kampo ni Democratic Presidential candidate Joe Biden nga nagtulod kay Trump nga imando ang pagpauntat sang voting sa diin ginaakusahan niya ang Democrats nga mahimo nila gamiton ang mail-in ballots agud kawaton ang mga boto.
Sa interview sang Bombo Radyo kay Atty. Joenar Pueblo, iya ginpahayag nga mahimo nga magdangop si Trump sa korte suprema apang indi indi mangin mahapos para sa iya apisar nga mga kaalyado niya ang mga Supreme court justices.
Suno kay Pueblo, tuman man ka malip-ot ang tiempo para desisyunan ini sang korte suprema sa diin kinahanglan nga makapagwa na sang desisyon ang pinakamataas nga hukmanan sang Estados Unidos antes ang Disyembre 14 nga amo ang adlaw nga maga-convene ang mga electors.
Dugang pa ni Pueblo, indi man madali-dali ang pagpasaka ni Trump sang reklamo sa korte suprema bangud may yara pa sang mga korte suprema sa mga estado sa diin gina-contest ni Trump ang election results nga amo ang una nga nagakadapat nga magresolba sang iya election protest sa diin kinahanglan man ni Trump nga mangita sang mabug-at nga mga rason sa iya protesta.
Sa bahin naman sang kongreso, ginpaathag ni Pueblo nga mahimo nga ang mga myembro sang House of Congress ang magdesisyon ukon magpili sang presidente sa tion nga indi malab-ot sang bisan sin-o sa mga presidentiables ang 270 nga electoral votes.
Apang suno kay Pueblo, apisar madamo sang kongresista sa kada estado,mangin isa lang ang ila boto gani kinahanglan nga makakuha ang kandidato sang majority nga 26 votes agud magdaog.
