Ginalantaw sang House Prosecution Panel nga posible isa na naman ka tikang agud ma-delay ang impeachment trial ni Vice President Sara Duterte ang plano sang defense team nga magdangop sa Korte Suprema.
Ini matapos ginpahayag ni defense spokesperson Atty. Michael Poa nga handa sila nga idangop sa Korte Suprema ang isyu kaangot sa kadamuon sang mga boto nga kinahanglan agud mahatagan sang silot si Duterte sa Senate Impeachment Court.
Posible suno sa iya nga himuon nila ini sa masunod nga duha ka semana, ukon antes mag-resume ang proceedings sa Nobyembre 9.
Madumduman nga sang Setyembre 23, nagboto ang senator-judges agud panubuon ang voting threshold ukon ang kadamuon sang mga boto nga kinahanglan sa impeachment proceedings.
13 ka senador ang nagpabor sa sini, samtang nagpamatok naman si Presiding Officer Chiz Escudero nga nagpanindugan sa iya nauna nga ruling sa 16-vote threshold.
Suno naman kay Rep. Zia Alonto Adiong, spokesperson sang House Prosecution Panel, nagpagwa na sang desisyon ang Korte Suprema sa amo nga isyu sang Setyembre 30.
Ang ginatumod sini amo ang pagbasura sang Supreme Court sang separado nga mga petisyon nga ginpasaka nanday Atty. Victor Rodriguez, Atty. Ernesto Francisco Jr., kag Berteni Cataluña Causing bangud suno sa korte, wala sila sang bastante nga legal nga basehan sa pagpasaka sang kaso kag bangud man sa prematurity.
“The same case that has already been ruled by the Supreme Court… Hindi ko matantiya kung ano ang gusto nilang mangyari other than what it appears to be another legal maneuvering para mapa-delay itong trial na ito,” suno kay Adiong.
Dugang ni Adiong, pareho lamang ang topiko kag legal nga isyu sa nauna nga mga petisyon kag sa desisyon sang Korte Suprema.
Bisan pa gin-athag sang prosecution nga kinamatarong sang defense team ang pagdangop sa Korte Suprema, ginpahayag man ni Adiong nga posible nga indi magbag-o ang desisyon sang korte kon liwat nila nga idangop ang amo nga isyu.
“The same subject matter, the same legal question surrounding the decision of the Senate Impeachment Court. Eh baka yun din po ang maging decision ng ruling ng Supreme Court,” suno sa kongresista. “Antayin po natin kung meron talagang magfa-file sa kanila formally ng petition sa Supreme Court.”
