Gintawag nga pamulitika lamang suno sa kontraktor sang Mandurriao Public Market nga si former Iloilo City Councilor Plaridel Nava ang tinutuyo sang secretary sang Vendors Association sang Mandurriao nga si Rolyn Gallaza kun ngaa ginapakamalaot sini ang pagpabilin sang kaupod sini nga vendors sa sulod sa bag-o nga mercado.
Sa interview sang Bombo Radyo kay Nava, iya ginpahayag nga kontra-partido si Gallaza kag nagahimo-himo lamang ini sang istorya agud may pakalainon ini.
Suno pa kay Nava nga wala ini nagapasilabot sa mga aktibidades sa sulod sang mercado kag bilang kontraktor, iya lamang ginatungdan ang iya nga trabaho.
Ginklaro man sini nga sa isyu sang pagpabilin sang iban nga vendors sa bag-o nga mercado, ini bangud nga nagkalaguba na ang pwesto sang mga ini sa old market sang tyempo sang habagat, samtang ang pwesto naman ni Gallaza, maayo sa gihapon rason nga nagbalik ini sa gihapon sa iya daan nga ginabaligyaan.
Gin-athag man sini nga wala sang nagakatabo nga special treatment ukon nagmando si Mayor Raisa Treñas nga pillion lamang ang makasulod sa bag-o nga mercado bangud kagustuhan gid sang alcalde nga mapahamtang sila sa maayo nga lugar kun sa diin sila makabaligya.
Samtang, ginklaro man ni Nava nga wala ini nagapangakig sa mga vendors sa sulod sang Mandurriao Public Market bangud nagabaligya ang mga ini, apang ginsaway lamang sini ang kabataan sang mga vendors bangud ginakurisan sang mga ini ang pader sang bag-o nga mercado.
Bilang kontraktor sang mercado, katungdanan sini nga matapos ini sa madali nga tinion kag magamit na sang publiko.
Gindugang man sini nga sa Setyembre 14, adlaw sang Lunes, pabalikon na sang Local Economic Enterprise Office ang tanan nga mga vendors sa bag-o nga mercado agud wala na sang gamo nga magluntad sa tunga sang mga ini.
