Isa ka tuig matapos gin-deport ang nine-time champion kag Serbian tennis superstar nga si Novak Djokovic bangud wala nagpabakuna batok sa Covid-19, ginpahalugan na ang restrictions sa Australian Open.
Gin-anunsyo sang tournament director nga si Craig Tiley nga indi na required ang players nga mag-take sang Covid-19 tests; buot silingon, may virus man sila ukon wala, mahimo sila makahampang.
Suno kay Tiley, ang bag-o nga pagsulundan ang repleksyon sang kun ano ang nagakatabo sa mas masangkad nga komunidad ilabi na bangud indi na tuman ka istrikto ang mga pagsulundan subong sa Australia.
Magapanumbalik si Djokovic sa Australian Open subong nga tuig kag nagalaum nga maangkon ang iya fourth title sa five editions sang amo nga tournament.
Ang Australian Open amo ang una sa apat ka Grand Slam tennis tournaments kada tuig.
Indi pa maathag kun ano ang mangin masunod nga pagsulundan sa magasunod nga tournament nga French Open, Wimbledon sa United Kingdom kag ang U.S. Open.
Sa apat ka Grand Slam hosts, ang France lamang ang may yara pa sang mandatory isolation requirements sa mga naga-positibo sa Covid-19. ##
