𝗠𝗢𝗟𝗢, 𝗜𝗟𝗢𝗜𝗟𝗢 𝗖𝗜𝗧𝗬 — Ginpamatukan sang Sangguniang Kabataan (SK) sang South Baluarte, Molo, Iloilo City ang ila nga Punong Barangay bangud sa indi sini luyag nga suksokon sang mga players ang jersey nga may logo nga “Gugma” ni Iloilo City Lone District Representative Jamjam Baronda.
Sa interview sang Bombo Radyo kay Francis Palma, SK Chairman sang South Baluarte, Molo, Iloilo City, iya ginpahayag nga ginhambalan sila sang punong barangay nga indi pagsuksokon ang jersey kag kun pwede nga tapalan na lang sang sticker ang logo nga “Gugma” nga nagasimbolo kay Baronda.
Suno kay Palma, ang ila pagsuksok sang jersey uniform ang may tuyo nga maghatag sang credit kay Rep. Baronda bangud siya ang nag-sponsor sang ila nga panapton.
Ginpahayag man ni Palma nga personal siya nga nagpadulong sa opisina ni Baronda agud mabuligan sila bangud wala sang pondo ang barangay para suportahan ang pagpahimo sang ila nga jersey.
Gin-athag man sang SK Chairman nga wala sang halo nga pulitika ang pagsuksok nila sang jersey uniform kag wala man nila ginakampanya ang mamalidha apisar nga nagahilapit na ang eleksyon.
Natigayon naman nga masuksok sang mga players ang jersey sa ginhiwat nga parada subong nga adlaw.
Nagsabat man ang punong barangay sang South Baluarte, Molo, Iloilo City sa paghingyo sini nga indi pagsuksokon ang jersey uniform nga may logo nga “Gugma” ni Baronda.
Sa interview sang Bombo Radyo kay Punong Barangay Ronald Grandeza, iya ginpahayag nga antes paman magsugod ang liga, naghinyo na ini sa mga players nga kung pwede, indi lang pagsuksokon ang jersey bangud nga ang liga, ang pa-liga ni Raisa Treñas-Chu.
Suno kay Grandeza, ginarespeto niya kun sin-o man ang ginasuportahan sang ila nga Sangguniang Kabataan (SK) Chairman nga si Francis Palma.
Gin-athag man sang punong barangay nga wala siya sang ano man nga kalain sang buot bangud ginbuligan niya pa nga i-coach ang players nga nagasuksok sang jersey samtang sila ang nagahampang.
Tuyo naman sang natungdan nga istoryahon ang SK Chairman agud maresolba ang issue bangud isa lang man sila ka pamilya.
Nahibaluan nga hinablos ni Punong Barangay Grandeza si SK Chairman Francis Palma.
