PAVIA, ILOILO- Ginpanginbulahan sang mga opisyal sang Probinsya sang Iloilo ang Florete Group of Companies sa pagpatukod sang Plazuela Tres sa Pavia Iloilo.
Suno kay Pavia Iloilo Mayor Luigi Gorriceta, pinaagi sa Plazuela Tres, madamo sang mahatagan sang trabaho ilabi na nga mataas subong ang unemployment rate.
Ginpahayag ni Gorriceta nga magahatag sang discounts kag incentives ang local government sang Pavia sa Plazuela Tres.
Ginpasigurado man ni Gorriceta nga nga mapabilin ang kalinong sa Pavia ilabi na nga nagadamo na subong ang negosyo.
Magluwas sini, tinguhaan man sini nga mapa semento ang tanan nga mga dalan sa nasambit nga banwa agud nga mas mangin mahapos ang paglabay sang mga salakyan padulong sa Plazuela Tres.
Samtang suno naman kay Iloilo Gov Arthur Defensor Jr., ang investment sang Florete Group of Companies ang dako nga bulig sa Probinsya sang Iloilo.
Suno kay Defensor, duha lang ka sahi sang mga pumuluyo ang masami nga nagapadulong sa iya opisina.
Una ang mga barangay officials nga nagapangayo sang proyekto kag mga nagapangayo sang trabaho.
Pinaagi sa pagbukas sang Plazuela Tres suno kay Defensor, mahatagan sang trabaho ang mga pumuluyo.
Samtang suno sa gobernador, isa ka patimaan nga naga uswag ang ekonomiya amo ang pagdamo sang mga bangko kaangay na lang sang Queen City Rural Bank.
