ILOILO CITY – Ginagamit sang mga drug operators nga kahigayunan ang plea bargaining agreement nga yara sa layi agud suli-sulit nga makabaligya sang iligal nga droga.
Ini ang ginpahayag nga disbentaha sang Police Regional Office (PRO) 6.
Sa interview sang Bombo Radyo kay Pol. Lt. Col. Joem Malong, tagpamaba sang PRO 6, iya ginpahayag nga nangin ‘cycle’ na ang amo nga kaso, amo nga ginakabig ini sang kapulisan nga disbentaha.
Nagabaligya ang mga suspek suno kay Malong sang gamay nga quantity sang droga kag sa tion nga madakpan, ginagamit nila ang plea bargaining agreement agud makaguwa.
Sa idalom sang plea bargaining agreement, mahimo nga mabuhinan ang penalty sang isa ka suspek sa tion nga akuon niya ang iya sala.
Sa tion nga makaguwa, ginasulit na naman ang amo nga hitabo suno kay Malong.
Dugang pa ni Malong, wala man sang mahimo ang kapulisan bangud ini ang yara sa layi, apang ila ginpasalig nga ang tanan nga drug personalities nga nakasulod kag guwa sa prisuhan ang ginapaidalom sa monitoring.
