All set na ang Vallacar Transit Incorporated sa pagbalik sang byahe sang mga roll on roll off (RORO) bus halin sa Laguna padulong sa mga probinsya.
Ini ang kasunod sang pagpasugot sang Land Transportation Franchising and Regulatory Board (LTFRB) sa pagbyahe sang 221 ka mga units sang bus sa Region 6 ukon Western Visayas partikular sa Iloilo, Aklan, Antique kag Capiz.
Sa exclusive interview sang Bombo Radyo kay Ms. Jade Seballos, Media Relations Officer sang Vallacar Transit, iya ginpahayag nga makigsapol pa sila sa LTFRB agud istoryahan ang mga ipatuman nga pagsulundan.
Ang ila lang nga pasiguraduhon suno kay Seballos amo ang pagpasugot sang Sta. Rosa Integrated Terminal sa Laguna sa pagbaton sang tanan nga mga bus halin sa Western Visayas padulong sa Laguna and vice versa.
Ang pito nga ginbuksan nga ruta ang magahalin sa Sta. Rosa Integrated Terminal sa Laguna kag magabyahe ang mga bus padulong sa Kalibo kag Malay sa Aklan, San Jose sa Antique, Roxas City, Estancia, Miag-ao kag Iloilo City sa Iloilo kag vice-versa.
Magluwas sa Vallacar Transit, may iban pa nga mga bus companies suno sa natungdan nga magabyahe man halin sa Laguna padulong sa Western Visayas.Samtang, gin-athag man ni Seballos nga wala sang pagsaka sa plete sa bus.
Suno sa natungdan, indi sila mahimo nga magpasaka sang plete bangud mapasakaan sila kaso nga overcharging.
Apang kun magpanubo naman sila sang plete, pasakaan naman sila sang kaso nga undercharging.
Ginapasigurado man ni Seballos nga sundon nila ang mando sang LTFRB nga sundon ang health protocols kaangay sang pagsuksok sang face mask kag face shield; pagdumili sa paghambal ukon pag-istorya sa telepono; pagdumili sa pagkaon sa bus; pagpatigayon sang disinfection; pagdumili sa pagsakay sang mga pasahero nga may yara sang sintomas sang coronavirus disease 2019 (COVID-19) sa pampubliko nga transportasyon; kag pagsunod sa physical distancing ukon “one-seat apart” rule.
