Pormal na nga napasaka sang Office of the Ombudsman sa Sandiganbayan ang kaso nga plunder batok kay Sen. Rodante Marcoleta kag tatlo ka iban pa nga co-accused angot sa ₱75 million campaign donation.
Ang pagpasaka sang kaso natabo kasunod sang pagtakop sang tatlo ka adlaw nga hublag protesta sang mga myembro sang Iglesia ni Cristo (INC) bilang suporta kay Marcoleta nga prominente nila nga myembro.
Ang kaso batok kanday Marcoleta, former Anakalusugan Rep. Mike Defensor, kag mga negosyante nga sanday Aristotle Viray kag Joseph Espiritu ang gin-file sang state prosecutors sa anti-graft court.
Gin-raffle gilayon ang kaso nanday Marcoleta kag tatlo ka co-accused sa anti-graft Third Division.
Tun-an subong sang Third Division ang Information ukon Charge sheet agud madeterminar kun may basehan agud mag-isyu sang arrest warrant batok sa mga akusado.
Base naman sa layi, may 10 ka adlaw agud ma- review ang case information nga ginpasaka sang state prosecutors antes sila maka-isyu sang legal order.
Ang kaso nga plunder indi bailable gani mapreso gilayon sanday Marcoleta kag mga co-accused kun arestuhon na ang mga ini.
Ang apat ang ginpasakaan man sang kaso nga paglapas sa Presidential Decree No. 46, nga nagadumili sa public officials sa pagbaton, kag sa mga pribado nga mga indibidwal, nga maghatag sang regalo sa ano man nga okasyon.
