SYDNEY – Nagpasalig ang gobyerno sang Australia nga ipanagtag ang libre nga doses sang coronavirus disease 2019 (COVID-19) vaccine sa mga residente kun mag-abot na ini sa ila pungsod.
Suno kay Prime Minister Scott Morrison, may deal na ang Australia sa Swedish-British pharmaceutical company nga AstraZeneca may kaangtanan sa bakuna nga gina-develop sini sa Oxford University.
Ginpahayag sang prime minister nga ang ginatumod nga bakuna ang isa sa ‘most-advanced kag promising’ nga gina-develop subong sa bug-os nga kalibutan.
Suno kay Morrison, kun matapos na ang clinical trials kag magmadinalag-on, iga-manufacture ini sang Australia kag iga-suplay sang libre sa ginabanta 25 million ka Australians.
Ang Oxford vaccine ang isa sa 1 sa lima ka bakuna sa kalibutan nga yara na sa Phase 3 efficacy trials kag ginalauman nga mabaton na ang resulta sa katapusan sang tuig 2020.
Magluwas diri, nagapakig-angot man ang Australia sa iban pa nga mga pungsod para sa potensyal nga bakuna kag ila man ginasuportahan ang mga local scientists nga nagapaninguha agud makahimo man sang bulong batok sa COVID-19.
Ang Australia nga may yara na sang kapin 24,000 ka COVID-19 cases kun sa diin 438 ang narecord nga patay.
#
(With reports from Agence France-Presse)
