ILOILO CITY – Doble ang selebrasyon sa Marso 18 para kay Philippine Military Academy (PMA) Alab-Tala Class 2018 valedictorian Cadet 1st Class Jaywardene Hontoria.
Sa exclusive interview sang Bombo Radyo kay Hontoria, ginpahayag sini nga sa aga sang Marso 18 patigayunon ang ila nga graduation sa PMA kag sa hapon naman hiwaton ang iya kasal.
Pahayag ni Hontoria, antes siya nagsulod sa PMA, nagpromisa siya sa iya nobya nga si Loura Fe Dillera sang Arevalo kag tumandok sang Pontevedra, Capiz, nga kun hulaton lang siya matapos sang apat ka tuig, pakaslan niya ini.
Ini na suno kay Hontoria ang ti-on sa pagtuman sang iya nga gin-promisa sa iya nobya.
Nahibaluan nga ang duha ang mag-schoolmate sang naga-eskwela pa ang mga ini sa College of Nursing sa West Visayas State University kag si Dillera ang isa naman subong ka registered nurse.// Kaslon ang duha sa St. Ignatius Chapel sa Philippine Military Academy sa Baguio.