ILOILO CITY – Nagpang-agda ang Philippine Military Academy (PMA) sa mga Ilonggo nga luyag magkuha sang entrance exam agud mag-upod as Cadet Corps sang Armed Forces of the Philippines.
Sa interview sang Bombo Radyo kay Major Carlos Gamos, Chief Proctor sang PMA Entrance Examination, iya ginpahayag nga diri sa Iloilo City, patigayunon ang examination sa Iloilo City National High School sa Molo, Iloilo City sa bwas, Agosto 24 kag sa Dominggo, Agosto 25.
Suno kay Gamos, bukas ini para sa mga walk-in applicants.
Lakip sa mga qualifications kag requirements agud mangin cadete amo ang mga masunod:
-Natural-born Filipino citizen;
-Indi magnubo ang edad sa 17 anyos kag indi maglapaw ang edad sa 22 anyos sa Hunyo 1, 2025 nga amo ang admission year (ang birthdate ang nagakadapat nga halin sa Hunyo 1, 2003 tubtob Hunyo 1, 2008);
-Nagakadapat nga magdala sang original birth certificate;
-At least Senior High School Graduate (Grade 12);
-Nagakadapat nga may General Weighted Average nga 85%;
-Indi magnubo ang kataason sa 5’0″ (152.4cm) apang indi man maglapaw sa 6’4″ (193.04cm) para sa mga babaye kag lalaki;
-Nagakadapat nga single, wala nakaagi kasal kag wala man sang anak;
-May yara sang good moral character;
-Wala sang anuman nga administrative ukon criminal case;
-Nagakadapat nga makapasar sa Complete Physical-Medical Examination sang AFP Medical Board Number 1;
-Nagakadapat nga makapasar sa Physical Fitness Test kag Aptitude para sa Service Interview; kag
-Nagakadapat nga physically kag mentally fit para sa military training.
