Masulusobra lima ka bulan nga nangin matinong ang isyu sa kontrobersyal nga mandatory requirement sang motor vehicle inspection system sa Pilipinas apang liwat naman ini nga nabuhi subong nga bulan sang Agusto.
Ini matapos nagpagwa sang memorandum ang Land Transportation Office (LTO) nga naga-require sa mga motorista nga magpa-check sa Private Motor Vehicle Inspection Centers (PMVICs) antes makaparehistro ukon makapa-renew sang ila tagsa ka rehistro.
Sandig sa memorandum nga ginpagwa sang Agusto 6, mandatory na ini sa mga light vehicles nga may bug-at nga mas manubo sa 4,501 kilograms.
Sa interview sang Bombo Radyo kay Atty. Gaudioso Geduspan, assistant regional director sang LTO Region VI, iya ginpahayag nga ang naga-operate pa lang nga PMVIC sa rehiyon sa subong amo ang yara sa syudad sang Roxas kag Bacolod.
Nag-umpisa na sang Lunes ang pagpang-check sa PMVIC sa amo nga mga lugar.
Sa Iloilo City, may yara sang duha nga gintukod nga PMVIC — sa coastal road kag sa diversion road — apang wala pa sang probational authority to operate.
Kinahanglan pa ini nga mag-dry run kag kinahanglan pa nga i-check sang LTO.
Samtang wala pa sang PMVIC, status quo lang anay ang pagsulundan sa syudad sang Iloilo.
Ginpahayag pa ni Geduspan nga manubo naman ang bayaran sa PMVIC: Masobra P600 para sa four-wheeled vehicles, masobra P500 para sa motorsiklo kag traysikol, kag masobra P300 para sa mga pampubliko nga mga jeep.
