𝗜𝗟𝗢𝗜𝗟𝗢 𝗖𝗜𝗧𝗬 – Ginpamatud-an sang mga graduates sang West Visayas State University – College of Nursing (WVSU-CON) nga indi upang ang pandemya agud magpangibabaw ang mga ini sa November 2024 Philippine Nursing Licensure Exam (PNLE).
Sa 108 ka mga examinees, 100% ang nakapasar kag apat sa mga ini ang topnotchers.
Lakip sa mga topnotchers amo sanday:
-Ma. Irish Himan Silvestre sang Bitoon Ilawod, Cuartero, Capiz – 8th place (91%)
-Robert Matthew Manzon Opong sang Jibaoan, Pavia, Iloilo – 9th place (90.8%)
-Karen Joy Sobusa Oscares sang San Miguel, Iloilo – 9th place (90.8%)
-Richard Dahuyag Olano Jr. – 10th place (90.6%)
Sa interview sang Bombo Radyo kay Oscares, iya ginpahayag nga childhood dream niya nga mangin nurse.
Siya naman ang ika-duha nga nurse sa ila pamilya.
Suno naman kay Opong, nangin ispirasyon niya ang iya lolo kag tiya nga mangin nurse.
Ginpahayag sini nga ang nursing ang ginakabig sini nga isa ka trabaho nga makapabag-o sa kabuhi sang isa ka indibidwal.
Para sa iya indi lang ini propesyon, kundi isa ka ‘calling’ nga pagbulig sa mga tawo.
Nangin dako naman nga pagpahangkat para kay Silvestre ang pagtuon sa tunga sang pandemya.
Apang sa pihak sini, nangin dako nga bulig ang ila mga clinical instructors agud mangin mahapos ang ila pagtuon kag hospital duty.
Wala naman ini nahilig sa extracurricular activity sang yara ini sa kolehiyo sa diin mas gintutukan sini ang academics nga isa man sa ginalantaw sini nga rason sa iya pagkalakip bilang topnotcher sa pasinawan.
