ILOILO CITY – Mas mataas ang risk factors sang trending nga FaceApp kun ipaanggid sa iban nga mobile application.
Ini ang paandam sang Regional Anti-Cyber Crime Unit 6 sa mga nagagamit sang Russian-developed application.
Sa interview sang Bombo Radyo kay Patrolman Emerito Frutas Jr., Public Information Officer sang Regional Anti-Cyber Crime Unit 6, iya ginpahayag nga sa pag-download sang FaceApp, kinahanglan ang access sa gallery sang cellphone.
Suno kay Frutas, kun i-click ang ‘allow’, mahimo na nga ma-access ang tanan nga files kasubong sang laragway nga naka-save sa phone gallery kag ini ang nagaderetso sa isa ka system nga mahimo ma-access sang perpetrator.
Ginpahayag ni Frutas nga sa tion nga maglapta na sa internet ang laragway ukon video, mabudlay na ang pagtapna sini ilabi na kun may yara na sang nag-download kag liwat ini nga i-upload.
Sa subong, padayon ang pagtuon sang mga eksperto kun paano mapanubo ang risk factors ilabi na para sa mga naka-download sang nasambit nga application.
Para naman sa mga naka download na, mas makapaayo nga i-delete ukon i-uninstall ang FaceApp.
