PNP chief Dela Rosa magabisita sa pilason nga mga pulis nga gin-ambush sang NPA sa Iloilo

ILOILO CITY – Magapadulong sa siyudad sang Iloilo subong nga adlaw si PNP chief Police Director General Ronald dela Rosa.
Suno kay Department of Interior and Local Government (DILG) Undersecretary Eduardo Año sa interview sang Bombo Radyo Iloilo, bisitahon ni Dela Rosa ang 15 ka mga pulis nga napilasan matapos gin-ambush sang New People’s Army sa Maasin, Iloilo kag Sibalom sa Antique.
Padulungan man sang PNP chief ang haya ni PO2 Joeffel Odon nga napatay sang NPA sa banwa sang Maasin.
Ginpahayag ni Año nga dugang nga bulig ang dala ni Dela Rosa para sa mga pulis magluwas pa sa bulig nga ginpanagtag man kahapon sang DILG official.
Ginkalipay naman sang mga pulis ang ginpakita nga suporta sa ila sang pamunuan sang PNP.
Ginpahayag ni PO1 Rolando Lozada nga ginpataas sini ang ila nga moral kag daw kaangay nadula ang ila gina-antos nga kasakit sa naangkon nga kapilasan.
Ginpasiguro naman sang mga pulis nga mabalos sa New People’s Army.