ILOILO CITY- Balewalaon lang ni Philippine National Police (PNP) chief Gen. Guillermo Eleazar ang panawagan sa iya nga magpadalagan para sa masunod nga eleksyon.
Suno kay Eleazar, magaretiro na siya sa Nobyembre sa tion nga 56 na ang iya edad nga amo ang mandatory retirement age sa PNP.
Ginpahayag sang PNP chief nga indi niya luyag nga maistorbo ang iya trabaho ilabi na nga ginahatagan sang malisya sang iban ang iya trabaho apisar madugay na niya ini ginatungdan.
Dugang niya, wala siya sang iban nga handom pagkatapos sang iya trabaho kundi amo ang magpahuway kag makaupod ang iya pamilya.
Nagpangabay man ini sa mga tawo nga nagaduso sa iya nga magpadalagan sa eleksyon nga buligan na lamang ang PNP.
Si Eleazar ang nagbulos kay Ret. Gen. Debold Sinas sang Mayo.
Si Senator Ronald “Bato” dela Rosa ang anay PNP chief nga nanguna sa drug war sang administrasyon antes nagpadalagan sa pagka-senador kag nagdaog.
