ILOILO CITY – Gintawag ni Philippine National Police chief General Rommel Francisco Marbil nga first class ang apat ka mga dugang nga police stations sa Iloilo City.
Si Marbil ang personal nga nagpadulong sa Iloilo City kahapon agud pangunahan ang inauguration sang mga bag-o nga police stations sa syudad.
Ini amo ang Iloilo City Police Station 7 sa I-Care Center sa Barangay Tanza-Esperanza; Iloilo City Police Station 8 sa Bo. Obrero Barangay Hall sa Lapuz; Iloilo City Police Station 9 sa Uswag Youth Center sa Jaro; kag Iloilo City Police Station 10 sa ICARE Center sa Gaisano ICC sa Mandurriao.
Sa interview sang Bombo Radyo kay Iloilo City Mayor Jerry Treñas, iya ginpahayag nga wala sila naka-istorya sang personal ni Marbil bangud yara ini sa Manila agud magpa-check up.
Apang suno kay Treñas, nagtawag sa iya si Marbil kahapon kag nagpasalamat sa suporta nga ginhatag sa Iloilo City Police Office.
Ginpahayag sang alkalde nga naghatag sang tatlo ka mga police patrol cars ang Iloilo City Government para sa mga bag-o nga police stations samtang ang isa naman ka patrol car ang mahalin sa Philippine National Police.
Magluwas diri, ginpahayag sang alkalde nga nagbakal man ang syudad sang 80 ka mga armalite, 5,000 ka rounds sang bala sang armalite kag iban pa nga mga equipment.
Nagalaom naman ang akalde nga mas madasig na ang pagresponde sang mga pulis sa mga insidente kag matapna ang mga krimen sa syudad.
