Pangunahan ni Philippine National Police (PNP) chief General Rommel Francisco Marbil ang formal activation sang apat ka dugang nga police stations sa Iloilo City subong nga adlaw, Hulyo 2.
Antes pa man ini nga seremonya, una na nga gin-anunsyo ni Iloilo City Police Office (ICPO) director Police Colonel Joeresty Coronica ang apat ka police officers nga magapamuno sa bag-o nga units.
Si Captain Joebert Amado ang mangin head sang Iloilo City Police Station 7 sa I-Care Center in Barangay Tanza-Esperanza; Captain Lester Oliveros sa ICPS8 sa Bo. Obrero Barangay Hall sa Lapuz district; Captain Jeffrey Delgado sa ICPS9 sa Uswag Youth Center sa Jaro district; kag Captain Nonito Venteroso sa ICPS10 sa ICARE Center sa Gaisano ICC sa Mandurriao district.
Sa interview sang Bombo Radyo kay Police Major Shella Mae Sangrines, spokesperson sang ICPO, iya ginpahayag nga makabulig ang bag-o nga mga estasyon nga mapasangkad ang police presence kag visibility sa kabug-usan nga syudad.
Suno kay Sangrines, bangud 10 na subong ang estasyon sang pulis sa syudad, mas mapalapit sa komunidad kag pumuluyo ang seguridad kag proteksyon nga mahatag sang kapulisan.
Ginalauman man sini ang mas madasig nga pagresponde sang kapulisan sa mga emerhensya kag matahap man ang mga residente nga maghimo sang krimen.
“We have procured the office desks, chairs, computers, and the rest. Three police cars have already been procured since the PNP will provide one. We will also buy them long firearms,” kabahin naman sang statement ni Mayor Jerry Treñas bilang suporta sang city government sa pwersa sang PNP.
Nahibaluan nga sang 2019 pa sang gintulod nga dugangan ang police stations sa syudad apang wala nadayon bangud sa pandemya.
