𝗜𝗟𝗢𝗜𝗟𝗢 𝗖𝗜𝗧𝗬 — Personal nga nagpadulong si Philippine National Police (PNP) Chief General Rommel Francisco Marbil sa Iloilo City kasunod sang pag-inagurar sang apat ka bag-o nga mga police stations sa syudad.
Nagserbi bilang dinapit nga bisita kaupod ni Marbil si Police Regional Office 6(PRO6) Director Brigadier General Jack Wanky, Governor Arthur “Toto” Defensor, Jr., kag Iloilo City Lone District Representative Julienne “Jam-jam” Baronda kag iban pa nga opisyal sang ahensya sang gobyerno.
Sa interview sang Bombo Radyo kay Police General Marbil, iya ginpahayag nga ang mga bag-o nga police stations ang mangin madinalag-on sa paghatag sang seguridad kun may suporta kag kooperasyon sang publiko.
Suno kay Marbil, ang apat ka stations ang magabulig sa Iloilo City agud mapibilin ini nga hilway sa krimen, malinong, kag matawhay.
Magaserbi naman bilang officer-in-charge sanday Police Captain Joebert Amado para sa Police Station 7 sa Tanza Esperanza, City Proper; si Police Captain Lester Oliveros sa Police Station 8 sa Bo. Obrero, Lapuz; si Police Captain Jeffrey Delgado sa Police Station 9 sa M.H del Pilar, Jaro; kag si Police Captain Nonito Venteroso sa Police Station 10 sa Mandurriao.
Kadungan sang kahiwatan amo ang pag-inagura sa Multi-Purpose Building, Adoration of Mini Park, Drainage and Flood Control System, kag PRO6 Road Network.
