Handa si Philippine National Police chief Police General Oscar Albayalde nga mangin subject sa panibag-o na naman nga imbestigasyon may kaangtanan sa kontrobersyal nga buy bust operation nga ginpatigayon sang iya anay mga pulis sa Pampanga sang Nobyembre 2013.
Ini matapos nga gin kwestyon ni Baguio City Mayor Benjamin Magalong, anay Criminal Investigation and Detection Group chief, ang nangin katungdanan ni Albayalde nga ginapahayag ginaprotektahan ang mga nadakpan nga mga ninja cops.
Suno kay Albayalde, wala siya sang ihibalo sa buy bust operation tubtob nga ginpresenta na ini sa iya ni Major Rodney Raymundo Baloyo IV, anay pinuno sang team nga nagpatigayon sang raid.
Nagapanindugan si Albayalde nga wala siya sang ihibalo sa nagakatabo nga anomaliya sa operasyon.
Sa iya nga pagdumdom, ang buy bust operation ang nangin maayo nga accomplishent sa idalom sang iya pagpamuno bilang direktor sang Pampanga tubtob nga sang Marso 2014 gin-imbestigahan na siya kag na relieve pa sa pwesto.
Sa bahin naman ni Magalong, nagakadapat nga wala na gindala ang items nga nakumpiska sa operasyon sa opisina sang isa ka provincial director sa baylo, mismo ang director ang nagpadulong sa lugar kag didto maghiwat sang prescon.
Apang napaslawan si Albayalde nga himuon ini.
Kuntani sa una pa lang suno kay Magalong, nagduha-duha na si Albayalde bangud indi properly labeled ang mga droga, wala sang chemist, wala picture kag ang inventory ang wala man sang pirma.
Dugang pa ni Magalong, nagduda na kuntani si Albayalde kag naghimo gilayon sang imbestigasyon.
Nahibaluan nga ang mga pulis ang gina-alegar naga-recycle sang mga nakumpiska nga mga droga nga makuha sa buy bust operation kag ginabaligya agud nga makwartahan.
