ILOILO CITY- Ginpaandaman ni Police Brigadier General Rene Pamuspusan ang mga kapulisan nga maga- augment sa Dinagyang Festival 2020 nga dapat mag perform sang maayo agud mangin matawhay kag wala sang matabo nga krimen kadungan sang kahiwatan.
Sa ginpatigayon nga send off ceremony sa Iloilo City Hall, may yara sang 2, 940 tanan ka mga security personnel sa diin 1, 940 diri ang halin sa Police Regional office 6 ; 707 halin sa Iloilo City Police Office ; 97 sa Philippine Army, kag 134 ang halin sa Philippine Coast Guard.
May yara man sang 117 nga mga emergency responders: 96 diri ang gikan sa Bureau of Fire Protection kag 21 gikan sa City Disaster Risk Reduction and Management Office.
Sa logistics naman, 33 ang Philippine National Police patrol vehicles, may yara man sang i-provide nga truck ang Philippine Coastguard, 87 ka motor vehicles, 6 ka Philippine Coastguard motor vehicles, kag 134 ka mga handheld radios.
Isa sa ginpaandam ni Pamuspusan amo nga tandaan gid sang mga kapulisan nga ginadala nila ang ngalan sang bilog nga organisasyon kag dapat nga indi gid mag- gamit sang cellphone samtang naga -duty ilabi na gid kun indi related sa ila trabaho.
Sa tion nga sila ang madakpan, ginapasigurado gid sang regional director nga manabat ang mga ini.
Samtang, dako man ang pagpasalamat sang alkalde sang siyudad sang Iloilo sa mga kapulisan nga nag-augment sa Dinagyang Festival.
Suno kay Mayor Jerry Treñas, ginalauman niya nga wala sang krimen ang matabo kadungan sang kahiwatan bangud sa presensya sang kapulisan.
