ILOILO CITY – Gindula sang kapulisan ang kahangawa sang mga pumuluyo sa Western Visayas, kasunod sang paglapta sang mga impormasyon nga nagapahayag nakasulod na ang Maute group sa Rehiyon 6.
Sa mensahe nga ginpadala sang Iloilo City Police Office sa Bombo Radyo, gin-athag sini nga wala sang validated information nga nakasulod na ang mga rebelde sa siyudad.
Suno naman kay Iloilo Provincial Police Office Director S/Supt. Harold Tuzon, hugton pa ang seguridad sa probinsiya.
Gin-apelar sang kapulisan nga untatan ang pagpalapta sang mga impormasyon nga wala sang kamatuoran.
Nahibaluan nga napuhag ang mga pumuluyo sang Western Visayas matapos naglapta ang mga impormasyon sa text message kag social media nga may presensiya na sang rebelde nga grupo sa Iloilo.