Ginpabaskog sang Philippine National Police (PNP) ang seguridad sa paghupot sang armas matapos ang sunod-sunod nga mga insidente sang pagpangluthang sa mga eskwelahan sa pungsod.
Ginakinahanglan na ang mga aplikante sang firearm license nga magpasa sang litrato sang ila gun vault ukon bulutangan sang armas nga may kandado.
Ini nga bag-o nga requirement nagatuhaw sa pag-apply ukon pag-renew sang License to Own and Possess Firearms (LTOPF).
Gin-umpisahan na ini sa pagpatuman kahapon, Oktubre 5.
Suno kay Firearms and Explosives Office chief Brig. Gen. Melecio Buslig Jr., kinahanglan mag-upload ang mga aplikante sang litrato nga nagapakita sa ila kaupod ang gun vault ukon container nga ginataguan sang armas kag ini nagakinahanglan may lock kag yabi.
“All LTOPF applicants are required to upload a photograph showing the applicant with the gun vault or container secured with a lock and key,” suno kay Buslig.
Ginpahayag sang PNP nga ini nga direktiba resulta sang sunod-sunod nga insidente sang shooting incidents sa mga eskwelahan nga may kaangtanan sa armas.
Isa sa mga insidente natabo sang Septiembre 18 sa Banga National High School sa South Cotabato kun sa diin nagpaniro ang isa ka Grade 9 student sa iya mga schoolmate nga nagresulta sa kamatayon sang duha ka estudyante kag pagkasamad sang walo pa.
Gintiro man sang 16-anyos nga suspek ang kaugalingon kasunod sang krimen.
Suno sa imbestigasyon, nakuha sang estudyante ang 9mm pistol sang iya amay matapos nga gin-guba niya ang safety vault.
Samtang, ginpahayag ni Civil Security Group director Maj. Gen. Aden Lagradante nga ginapabakod sang PNP ang pagpatuman sang Republic Act 10591 ukon Comprehensive Firearms and Ammunition Regulation Act.
Pinaagi sini, ginapasiguro nga husto ang pagtipig sang mga armas kag indi ini makuha ukon magamit sang mga indi otorisado ilabi na sang mga menor de edad.
