Ginapadalman sang Police Regional Office-6 kun may bag-o nga drug groups nga naga-operate sa Western Visayas.
Sa interview sang Bombo Radyo kay Police Colonel Arnel Solis, spokesperson sang PRO-6, iya ginpahayag nga indi pa conclusive ang ila gina-uyatan nga impormasyon kag padayon pa ini subong nga gina-validate sang intelligence operatives.
Isa man sa ginalantaw nga pagpanghangkat amo nga limitado na ang mga impormasyon nga ginahatag sang ila nagkadalakdpan nga drug personalities kun sa diin sila nagakuha sang suplay sang iligal nga droga.
Sa pihak sini, padayon nila nga gina-engganyo ini nga mga personalidad suno kay Solis para nga mahimo na nga drug-free ang rehiyon.
Una naman nga ginpahayag ni PRO-6 chief Police Brig. Gen. Jack Wanky nga ginatumod sang Regional Intelligence Division kun may kaangtanan ang bag-o lang nadakpan nga drug suspects sa bag-o nga major groups ukon mga sindikato.
Para nga makonsiderar ang grupo nga isa ka drug syndicate, kinahanglan nga makapasar ini sa validation nga gina-conduct sang Regional Police Intelligence Committee.
Nahibaluan nga sang Hunyo 1 tubtub sang Hunyo 22 lamang subong nga tuig, nagdangat gid sa P30.5-million nga balor sang shabu ang na-recover sang otoridad sa 176 ka anti-drug operations sa bilog nga Western Visayas. Sa sini nga mga operasyon, yara sa 237 ka drug suspects ang nadakpan.
(Photo: PRO 6)
