Ginaduso sang Philippine National Police (PNP) sa pagpanguna ni PNP Chief PGen. Nicolas Torre III ang paggamit sang mas madamo nga body-worn cameras, drones, mga mobile closed-circuit television (CCTVs) agud nga mas mapadasig ang response time sang mga pulis sa mga emergencies sang publiko.
Ini ang ginkumpirmar ni Police Regional Office III Director kag PNP Spokesperson PBGen. Jean Fajardo nga ang PNP ang may yara na karon sang indi magnubo sa 2,700 nga mga body-worn cameras kun sa diin 648 halin diri ang may ikasarang nga maka-live broadcast samtang ang nabilin ang ginagamit para maka-record.
Suno kay Fajardo, kon maka-fully operational na ang 911 , luyag mismo sang hepe nga tanan nga mga nagapatrolya nga mga pulis ang may suksok nga BWC.
Ini matapos nga ginmando ni Torre sa ila pinakauna nga Command Conference nga dapat himuon nga mas moderno ang pagresponde sang mga pulis sa kinahanglanon sang mga Pilipino ilabi na kun para ini sa pagpabilin sang ikaayo kag katawhayan sa mga komunidad.
Samtang, kasunod sini ginaplano man sang PNP nga maggamit sang mga drones ilabi na kun may mga dalagko nga pagtililipon kun sa diin may yara na sila sang 965 nga mga drones nga ginpreparar sang organisasyon.
Kabahin man sang bag-o nga modernized approach sang PNP ang paggamit sang mga CCTV cameras para sa 360° nga pagsubaybay sa mga lugar nga ginakadtuan sang kadam-an.
