ILOILO CITY – Ginaduso sang Philippine National Police (PNP) ang pag-ilis sang layi tuhoy sa paggamit sang helmet sang mga naga-motorsiklo sa syudad sang Iloilo.
Ini ang may kaangtanan sa wala pa sa gihapon masolbar nga mga riding-in-tandem incidents kun sa diin ang mga suspek ang nakasuksuk sang full face helmet agud nga indi makilala.
Sa interview sang Bombo Radyo kay Police Brigadier General John Bulalacao, Regional Director sang Police Regional Office (PRO) 6, iya ginpahayag nga may pila ka mga rason kun nga-a wala pa sa gihapon masolbar ang mga riding-in-tandem incidents sa syudad ang Iloilo.
Lakip sa mga rason amo nga ang mga suspek ang nagasuksuk sang full face helmet, madasig ang pagmaneho sang motorsiklo kag nagagamit sang indi lisensyado nga armas-luthang.
Bangud sini, mas makapaayo suno kay Bulalacao nga sakdagon sang nagkalain-lain nga stakeholders ang ginaduso sang PNP nga position paper nga kinahanglan sang mga motorcylce riders nga magsuksuk sang open face helmets.
