Ginpahayag ni Philippine National Police (PNP) Chief Gen. Nicolas Torre III nga ginalantaw sang PNP ang posibilidad sang pagbakal sang non-lethal nga kagamitan para sa mga pulis nga nagaresponde sa mga insidente, agud malikawan ang madugo nga engkwentro sa mga suspetsado.
Ini nga pahayag ang naguwa matapos ang insidente sa Pavia, Iloilo sang nagligad nga Sabado, kun sa diin gintiro-patay sang isa ka pulis ang isa ka lalaki nga nagawaras kag may dala nga kutsilyo.
Suno kay Torre, ang ginakonsiderar nga non-lethal weapons amo ang mga plastic nga batuta, pepper spray, kag taser.
Una na nga nagmando si Torre sa mga kapulisan nga una dapat gamiton ang non-deadly nga pamaagi sa pagresponde sa mga krimen.
Samtang ginapatigayon ang imbestigasyon sa pulis nga nalakip sa insidente sa Pavia, ginpahayag ni Torre nga ginhahatagan anay ini sang benefit of the doubt kag padayon nga ginasuportahan sang PNP leadership.
Pahayag man ni Torre nga kabahin sang standard training sang mga kapulisan ang paggamit sang unarmed combat, disarming techniques, kag iban pa nga non-lethal nga pamaagi sa pagpakalma sang mga peligroso nga sitwasyon.
